Verkfræðistofa Bjarna Viðarssonar er sérhæfð á sviði hönnunar, ráðgjafar og þjónustu fyrir samgöngumannvirki og byggingar. VBV hefur á liðnum árum leyst fjöldann allan af stórum og vandsömum hönnunarverkefnum á þessu sviði, bæði á Íslandi og í Noregi.

VBV hefur hannað fjölda vegamannvirkja sem byggð hafa verið bæði af Vegagerðinni og Statens Vegvesen í Noregi.  Vegahönnun nær einnig til hönnunar hringtorga og annarra vegamóta sem og sérhæfðra veghluta svo sem klifurreina, vigtarplana, stórra bílastæða og bílastæðahúsa.

VBV býr yfir öflugri sérþekkingu á sviði gatnahönnunar og samgöngumannvirkja í þéttbýli, bæði endurnýjun á núverandi gatnamannvirkjum sem og hönnun í nýjum hverfum. Dæmi um verkefni stofunnar á þessu svið eru Prinsensgate við Stórþingið í Osló og Festningskvartalene í nágrenni við Ráðhús Oslóborgar.

VBV hefur leyst mikið af fjölbreyttum burðarvirkjum samgöngumannvirkja. Hér er t.d. um að ræða eftirspennt og slakbennt steypuvirki svo sem brýr, göngubrýr og undirgöng, en einnig samgöngumannvirki sem ekki eru eins hefðbundin á Íslandi, svo sem öll ný burðarvirki við stækkun lestarstöðvarinnar í Voss.

VBV býr yfir sérþekkingu á sviðum burðarþolshönnunar og nýtir nýjustu þróun í hönnunaraðferðum, hugbúnaðartækni og þríviddarvinnslu til þess að uppfylla þarfir viðskiptavinarins, hvort sem um er að ræða ný eða eldri mannvirki. Af þekktum mannvirkjum þar sem VBV hefur séð um burðarþolshönnun má nefna Grand Hótel Reykjavík, Háskólatorg og bílapallinn við Smáralind.

Þjónusta við framkvæmdaraðila og fasteignafélög er yfirgripsmikill málaflokkur hjá VBV. Sem dæmi um verkefni á þessu sviði má nefna greiningu akstursferla og umferðarflæðis á nýrri lóð Posten við Alanabru í Oslo og hönnunarstýringu þjónustumiðstöðvar við Gullsmára í Kópavogi.